Cartel do curso de BD de Eco
Continúa a consolidación das propostas formativas encol da banda deseñada no noso país. A seguir o ronsel de anos anteriores, na Biblioteca de Vigo celébrase, a partir do vindeiro 8 de outubro o habitual curso de iniciación que se celebrará cada sábado de 12 a 13:30 ata o vindeiro mes de xuño. María Vilar imparte as aulas e a inscrición está aberta a partir do pasado 20 de setembro. A mesma debuxante, canda a Iago Araújo, comeza oficialmente o curso o 6 de outubro e desenvolverá a súa actividade xoves e venres ata xuño de 18:30 a 20:30. Ao tempo, en Compostela a Escola de Arte Eco arrinca o 7 de outubro o seu curso anual, que se artellará en obradoiros trimestrais e ten a matrícula aberta. José Manuel de la Reguera será o profesor titular, e o primeiro obradoiro estará a cargo dun autor galego aínda por concretar.
