O escultor Buciños galardoado co Premio Trasalba

O escultor Manuel García, de nome artístico Buciños ven de ser recoñecido pola Fundación Otero Pedrayo co Premio Trasalba na XXXVIIIª edición do galardón que recoñece a persoeiros da cultura galega. Por medio dunha reunión telemática a executiva da entidade tomou esta decisión que fixo pública no pasado fin de semana. A entrega do premio estaba prevista no mes de xuño, no sábado máis achegado ao San Pedro, pero xa foi adiada pola fundación para o outono, sen data concreta, aínda que apuntan "entre a vendima e a castiñeira".

Buciños, de 82 anos, é natural da aldea lucense da que tomou o nome e ten xustamente entre os seus recoñecementos anteriores o Premio Otero Pedrayo da Deputación de Ourense, concedido en 2016. Ourensán de adopción desde hai décadas, pertenceu ao grupo de artistas que frecuentaron o trato de Otero Pedrayo e Vicente Risco e que incluía a Xaime Quessada, Xosé Luís de Dios, Acisclo Manzano, Xavier Pousa e Arturo Baltar. Segundo apuntan desde a fundación Buciños, "é sen dúbida, un dos escultores referenciais do país". Os seus bronces de variado formato adornan multitude de coleccións e espazos públicos de Galicia e fóra. O Centro Cultural Marcos Valcárcel, de Ourense acolle unha exposición con 60 pezas súas estreada pouco ante do comezo do Estado de Alarma. O pasado ano este premio da Fundación Otero Pedrayo recaeu na desaparecida poeta Luz Pozo Garza.