Premio Trasalba para a Editorial Galaxia

O padroado da Fundación Otero Pedrayo acordou outorgar o Premio Trasalba 2025 á Editorial Galaxia, que celebrará o próximo ano o 75 aniversario da súa fundación. Con este galardón, desde a fundación recoñécese nesta empresa "a promoción da cultura e da lingua galega, así como o papel que desenvolveu a Editorial Galaxia no renacer cultural e lingüístico de Galicia desde a súa creación en tempos difíciles ata o momento actual". Por suposto, o premio tamén recoñece o traballo e o esforzo ao longo destes anos por difundir, publicar e dar a coñecer a obra e a persoa de Ramón Otero Pedrayo.