Novas propostas levan a literatura infantil e xuvenil ao confinamento

Caramomia é o título da historia coa bota a andar a iniciativa Oito mans. A Deputación de Pontevedra promove este proxecto de escrita creativa na rede "que busca implicar a mocidade na lectura a través da publicación nas redes sociais desta historia xuvenil de misterio". Ledicia Costas, María Lado, Daniel Landesa e O Hematocrítico (pseudónimo de Miguel López) irán publicando na conta de Instagram da iniciativa os diferentes capítulos da narración, a comezar este 11 de maio.

Caramomia, cunha duración prevista de 24 capítulos, ten ademais un compoñente de interactividade. Tal e como anunciaba Ledicia Costas o pasado 8 de maio na presentación do proxecto,"é unha novela que se vai desenvolver sobre a marcha", xa que, logo dos catro primeiros capítulos, cando xa estean definidos os personaxes e a historia, "os lectores e lectoras van tomar decisións transcendentais que afectan á trama"mediante un sistema de votacións "no que darán opcións para que decidan por que camiño vai avanzando a resolución do misterio".

Pola súa banda, a escritora Rosa Aneiros estivo a desenvolver a través do seu Facebook a iniciativa
Historias Cativas.A autora presentou seste relatos nos que dialogaba con personaxes das súas obras. Os ourizos Espi, Pugón e Cacheiro, Elba, Aldara ou Edelmira, Eusebio ou Patricia atópanse en pequenos textos nos que se tratan diferentes cuestións arredor do confinamento.