A libraría compostelá Chan da Pólvora bota o peche

A libraría Chan da Pólvora, ubicada na compostelá Rúa de San Pedro, anunciou onte que bota o peche tras case catro anos nos que ofreceu unha selección de libros de poesía e unha programación cultural asociada a eles. No comunicado oficial, a libraría sinala que "o golpe económico derivado do Estado de Alarma dificultou en maior grao o noso presente" pero non é o único motivo. A principal razón explicada é "levamos tempo sen ver cumpridas as expectativas que guiaron este proxecto. A excepción das marabillosas noites que animaron o Polvorín de versos, cada vez ían aumentando as actividades nas que a afluencia de público era escasísima, sen importar as horas dedicadas á preparación e difusión das mesmas". Para os promotores do proxecto, "isto evidencia unha realidade que non podemos seguir obviando: Compostela non precisa dunha libraría ao xeito da que tentamos construír". O peche da libraría non afecta á editorial do mesmo nome.