A presentación de Desnortada, último poemario de Rosalía Fernández Rial, abría este 24 de novembro as portas de Espiral Maior Foro. A editorial de poesía promove este novo local cultural en Carballo, que define como un espazo "mixto, aberto ao público, que une á sede editorial da propia Edicións Espiral Maior (cando cumpre como empresa 30 anos de existencia), unha libraría especializada e unha galería de arte".
Unha exposición extraordinaria do pintor Xulio García Rivas abrirá o apartado artístico deste proxecto, que tamén acollerá en vindeiras datas un club de lectura, obradoiros de creación poética e artística, presentacións de libros, mesas reondas, conferencias e outras intervencións culturais. A editorial sinala que a súa aposta por Carballo como sede débese a ser a vila, un "centro económico, social e cultural de primeira orde", así como "un enclave urbano e natural magnífico".
![Rosalía Fernández Rial gaña o certame de poesía 'aRi[t]mar galiza e portugal'](https://culturagalega.gal/imaxes/edicion/mm_retrato-de-Rosalia_Fernandez.jpg)
