Pechan un dos camiños tradicionais do castro de Baroña aproveitando o confinamento

Tras sabermos estes días que unha empresa forestal provocou importantes danos á calzada tradicional de acceso ao castro de Baroña, hoxe sóubose que outro propietario pechou tamén nestes días un dos accesos tradicionais ao castro instalando un portalón, muros e sebes. Trátase do camiño ubicado ao carón do bar que se atopa no inicio dos sendeiros que baixan ao xacemento arqueolóxico e á praia de Arealonga. Segundo Luís Oujo, alcalde do Porto do Son, as obras foron feitas "aproveitando o tempo de confinamento", sen a solicitude de ningún dos permisos ou licenzas preceptivas, xa que o terreo se atopa dentro da "zona arqueolóxica" delimitada como parte do Ben de Interese Cultural do Castro de Baroña. O concello xa comunicou a infracción a Patrimonio e á Axencia de Protección da Legalidade Urbanística da Xunta, así como requeriu ao propietario a retirada das obras.