Coa intención de dar a coñecer a figura de Ricardo Carballo Calero, protagonista do Día das Letras Galegas desde 2020, dúas iniciativas están a lanzar na rede unha serie de entrevistas sobre o profesor. Deste xeito, o Portal Galego da Língua anuncia a vindeira publicación de 17 vídeos na serie Carvalho em pessoa. O web Carvalho2020.gal recolle estas producións, e ten xa publicado un vídeo no que Reimunde Norenha, discípulo de Carballo e autor do libro O Cativeiro de Fingoi retrata a etapa do homenaxeado en Lugo, a repasar "como se sentia e como era Carvalho Calero no seu espaço afectivo e social", segundo explica o PGL.
Siña Fernández e Marcos Fernández, Carmen Herrero, Pepa Carro, J. Carlos Teijeiro, Manuel Sánde, Adela Figueroa ou Araceli Herrero protagonizarán as vindeiras entregas da serie.
Do mesmo xeito, tamén a canle de Youtube LinguagalegaTV, que mantén Acuarela Comunicación co apoio da Secretaría Xeral de Política Lingüística, estrea este mércores 8 de abril unha entrevista con Henrique Da Costa. O autor da biografía Carvalho Calero, vida e obra dun ser polifacético fala sobre a figura do homenaxeado. Á súa seguirán outras entrevistas realizadas en liña durante o confinamento.
