Os centros educativos levan á rede as súas homenaxes a Carballo Calero

Malia ao adiamento das iniciativas propostas pola RAG e a suspensión das aulas pola crise da Covid-19, os centros de ensino continúan coa súa actividade arredor de Carballo Calero durante a primavera. O portal Lingua.gal da Dirección Xeral de Política Lingüística compila unha grande parte destas propostas, entre as que se atopan formatos xa clásicos como o Telexornal Carvalho Calero do CPI dos Dice (Rois), xogos de preguntas sobre o homenaxeado, liñas do tempo, guías didácticas en diferentes niveis ou repasos biográficos en vídeo.



A tamén habitual vídeo homenaxe iustrada do Colexio San Pío X repasa a vida e a obra do autor con narración do alumnado de quinto de primaria.



A estas súmanse aínda outras iniciativas como o vídeo no que o IES de Arzúa repasa a biografía de Carballo ademais de recoller as súas propostas lingüísticas e diferentes actividades do centro sobre a súa figura.



Pola súa banda, no CEIP Plurilingüe Calvo Sotelo do Carballiño o alumando de sexto de primaria gravouse a cantar adaptacións musicais de poemas do autor da man do seu profesor de música José Luis Fernández Carnicero.