Unha exposición do CCG explorará as conexións políticas e culturais de Afonso X con Galicia

O Consello da Cultura Galega celebrará no ano 2021 unha exposición sobre a relación entre Afonso X e Galicia. Co gallo do aniversario da morte do monarca, o 4 de abril de 1284, o Consello da Cultura Galega anunciou a celebración dunha exposición na que se presentará a relación entre Afonso X e Galicia, coñecido sobre todo por promover o gran conxunto lírico das Cantigas de Santa María. O profesor e musicólogo Antoni Rosell, que será o comisario da mostra, sinala que "sobre Afonso X fixéronse moitas exposicións que amosaron imaxes recias, precisas e panorámicas sobre o monarca, pero nós queremos conectar a súa figura con Galicia a través da súa infancia pero, sobre todo, da súa actividade política e cultural”. A exposición terá, segundo o seu comisario, "un marcado carácter interactivo para chegar para un público contemporáneo que está acostumado a recibir contidos a partir de medios audiovisuais, a través dos que se mergullará non só na figura de Afonso X senón tamén na cultura do seu tempo". Para anunciar a celebración desta exposición, o Consello da Cultura Galega visibilizou na rede distintos materiais producidos polo CCG e vinculados á súa figura, incluída a descarga de balde do Códice de Toledo das Cantigas de Santa María