O lucense Pepe Peinó faise co Premio Internacional para obras de Teatro Joven

Erregueté dá conta dun novo galardón para dramaturxia galega. O autor lucense Pepe Peinó acaba de se facer co Premio Internacional para obras de Teatro Joven que convoca a editora gaditana Dalya. Peinó impúxose na categoría A, para obras de máis dunha hora de duración, con Algo. Este texto dramático en galego aborda a situación de Pedro, un rapaz na procura de opcións para lle dar un sentido á vida. O xurado valorou da obra a "comicidade e a alegría achegadas á acción dramática que transmite á mocidade valores e reflexións sobre os seus obxectivos persoais na vida". O gañador leva un premio de 2.300 euros en metálico ademais da tradución da peza a un idioma diferente ao do certame, a súa publicación e unha lectura pública ou dramatización do texto.