Vidas cruzadas é o título da obra coa que Héctor Cajaraville, gañador do último premio Xerais, acaba de se facer co X Premio Raíña Lupa de Literatura Infantil e Xuvenil. O xurado deste galardón que convoca a Deputación da Coruña sinalou que a obra "trata un tema actual, con ingredientes abondo para atraer o interese dos lectores e lectoras" así como "a boa construción das personaxes, con personalidades complementarias, que empatizan co público mozo, o sentido do humor, o carácter interxeracional e o final circular". Cajaraville impúxose co seu traballo entre os 27 presentados e fíxose co galardón, dotado con 6.500 euros e a publicación da obra.
O xurado estivo composto por María Paz Castro Piñeiro, Mª de las Mercedes Cerdeira Uría, Esther Gómez Suárez, Begoña Llamosas Albizu e Fernando Molezún Rodrígue, actuando como presidente Xosé Regueira Varela, deputado presidente da Comisión de Cultura e como secretaria Mercedes Fernández-Albalat Ruiz, xefa do Servizo de Acción Social, Cultural e Deportes.
