Un dos alumnos da Escola de BD O Garaxe Hermético, Manuel Tudela, acaba de se facer co VI Certame Galego de Banda Deseñada sobre Teatro. O premio que convoca a erregueté – Revista Galega de Teatro propuña este ano adaptar un fragmento da obra Caixa negra, de Fernando Epelde. O xurado, composto por Pepe Carreiro, ilustrador e autor de BD, Anxo Fariña, escritor, ilustrador e deseñador e Vanesa Sotelo, dramaturga e directora da erregueté seleccionou a proposta de Tudela a destacar "a adecuación da imaxe á intensidade dramática da obra de Fernando Epelde e a condensación narrativa conseguida". Agora, Tudela deberá completar a adaptación de toda a obra de Epelde, que sairá a luz a finais de ano. O autor recibirá ademais 800 euros de premio.
