Ames acolle na noite deste venres 14 de febreiro a estrea do último espectáculo de Teatro do Noroeste. Eduardo Alonso asina e dirixe As virxes salvaxes, unha montaxe que se presenta como "unha comedia xeriátrica" e que reflexiona "sobre a absurda pero necesaria situación de recluír aos nosos maiores en institucións que os atendan e coiden".
Elina Luaces, Luma Gómez, Rosa Álvarez, Imma António, Ana Santos, Manuela Varela, Miguel Pernas e Fernando González levan a escena esta proposta na que varias internas dun destes centros "comezan a cuestionar a institución non deixando nada en pe. A modo de metáfora da propia sociedade, as xentes de ben revélanse contra as imposicións absurdas e desmedidas. O caos que xeran pon a realidade contra as súas propias contradicións, creando situacións tremendamente divertidas".
Logo da presentación en Ames, a obra poderá verse en Vilagarcía (15 de febreiro), Viveiro (29 de febreiro), Vigo (26 de marzo) e Lalín (17 de abril).
