Teatro do Noroeste estrea As damas de Ferrol

"Unha comedia circular, ou mellor, en espiral onde a realidade e a fantasía debátense por ter a mesma carta de natureza, e seguramente a teñan". Así presenta a histórica compañía Teatro do Noroeste a súa última montaxe As damas de Ferrol. O Teatro Jofre da Cidade Departamental acolle este de 1 de decembro a estrea desta produción, un texto de Eduardo Alonso dirixido por Clara Gayo que chega a escena do Mónica Caamaño e Casilda Alfaro como protagonistas.

Segundo explica a presentación da obra, a mesma narra a historia de "dúas mulleres incapacitadas... Pero non incapaces. Dúas mulleres que creron inxenuamente no destino que se esperaba de/para elas. Dúas mulleres absolutamente frustradas e culpabilizadas por non acadar un status social, económico e 'romántico' que anhelaban e creron merecer, alomenos nalgún momento da súa vida".

A frustración e a desesperación levan as protagonistas á "construción dun universo ou realidade con normas propias que se converte nun inferno" e que ten como escenario un Ferrol "vivido e vivencial, un Ferrol como espazo impreciso, máis interior que externo, que todo o colorea da súa especial personalidade de cidade irrepetible nun país irrepetible no espazo e no tempo, tan irrepetible como inexistente".

A obra revisita un dos textos históricos da compañía, que o propio Eduardo Alonso dirixira hai dúas décadas. Despois da estrea, a obra poderá verse tamén o día 2 de decembro no propio Teatro Jofre e no Carballiño o 15 dese mesmo mes.