'Hierro' e 'Quien a hierro mata' acumulan candidaturas finalistas aos Mestre Mateo 2020

Os premios Mestre Mateo do Audiovisual galego organizados pola Academia Galega do Audiovisual xa teñen finalistas. A actriz Tamara Canosa e o presentador Rodrigo Vázquez (que o pasado ano levou o Mestre Mateo ao mellor comunicador e volve ser finalistas nesta ocasión) foron os encargados de ir dando a coñecer hoxe as candidaturas finalistas das 25 categorías a premiar. De acordo co modelo estipulado pola academia, ficción televisiva e cinematográfica entran a competir en igualdade na maioría dos premios resultando así que este ano a maior acumulación de postos finalistas vai de xeito case parello para a longametraxe Quien a hierro mata(Vaca Films), con 15 e a serie televisiva Hierro (Portocabo /Atlantique Productions) con 16 finalistas. Moi preto delas está a produción O que arde (Miramemira, S.L., 4 A 4 Productions, Kowalski Films, S.L., Tarantula Luxembourg) con 12 posibilidades de engadir un Mestre Mateo ao seu xa longo palmarés. O director Jorge Coira optará por partida dobre ao premio á Mellor dirección polos seus traballos en Hierro e Eroski Paraíso (nesta última compartindo dirección con Xesús Ron) e terá ademais a Óliver Laxe (O que arde) e Paco Plaza (Quien a hierro mata) como competidores na categoría. Eroski paraíso, a cinta baseada na obra de teatro do mesmo nome de Chévere, acada sete postos finalistas, mentres que Longa noite de Eloy Enciso optya a dous galardóns.

As tres producións que chegan con máis posibilidades finalistas competirán entre si en ata dez categorías. Deste xeito o debutante protagonista de O que arde, Amador Arias, compartirá momento na candidatura a Mellor Actor Protagonista con Luís Tosar (Quien a hierro mata), Darío Grandinetti (Hierro) e Miguel de Lira, por Eroski paraíso. Talvez esta última película que leva a pantalla a obra de teatro do mesmo nome sexa coa súa modesta proposta a gran revelación destas candidaturas dos Mestre Mateo ao acadar sete finalistas, tres deles como actor e dúas actrices protagonistas para Miguel De Lira, Cris Iglesias e Patricia de Lorenzo; a de mellor longametraxe; mellor dirección (Jorge Coira e Xesús Rón); mellor montaxe (Jorge Coira e Lucía Iglesias) e mellor dirección de fotografía. Ademais a película Longa noite de Eloy Enciso acada o posto finalista como mellor longametraxe e o de dirección de produción para Beli Martínez.


A produción cinematográfica Feedback (Ombra Films / Vaca Films) obtén tamén tres finalistas nestas edición do premios audiovisuais de Galicia, mentres que a serie policial da TVG A estiba acada ata 6 candidaturas. Na categoría de Mellor documental competirán catro producións de temáticas e narrativas ben diferentes: El futuro de la mente de Agallas Films e Somadrome; Manoliño Nguema de Filmika Galaica (produción que ven de ser premiada polo público no festival canario MiradasDoc); Noite Irisada de Taller de Insomnios e Recunchos de Anma e O reino suevo de Galicia de La Región. As gañadoras daránse a coñecer na Gala que se celebrará o vindeiro sábado 7 de marzo no Pazo da Ópera da Coruña, presentada por Patricia Vázquez e dirixada polo realizadior Luís Avilés.