Ibuprofeno Teatro estrea en Compostela O mel non caduca

"Un espectáculo biodegradable e ecosostible xestado a partir dun proceso de creación colectiva, arredor da relación do ser humano cos obxectos, da degradación ecolóxica do planeta por mor da perversa lóxica consumista do capitalismo e da obsolescencia programada, tanto dos produtos como das persoas". Así presenta Ibuprofeno Teatro o seu último espectáculo, O mel non caduca que chega ás táboas por vez primeira os días 31 de xaneiro e 1 de febreiro no Teatro Principal de Santiago.

Marián Bañobre e Avelino González protagonizan esta traxicomedia que escribe e dirixe Santiago Cortegoso. No escenario danse cita dúas tramas, unha na que dous científicos no futuro tentan resucitar a especie das abellas a partir dun tarro de mel, e outra na que dous irmáns debaten que facer co legado que os seus pais deixaron na aldea.

Despois da estrea, a montaxe conta xa con datas confirmadas en Ourense (27 de febreiro), Boiro (13 de marzo), Vigo (20 de marzo), Cangas (25 de abril), A Coruña (15 de maio) e Narón (16 de maio).