O CPI de Vedra, o concello e mais o proxecto Vedra Medra acaban de pór en marcha a primeira Escola de Xenerais. Esta iniciativa, que busca formar a mocidade local nas formas propias desta tradición, conta cunha vintena de participantes de entre 9 e 16 anos e consiste nunha serie de sesións nas que abordarán a creación e representación dos atranques propios desta celebración. O alumnado da iniciativa representará os seus traballos por grupos no entroido municipal, o 15 de febreiro, no CPI de Vedra o día 21 e na Xornada da Camelia o 23. A proposta pretende facilitar a participación e a transmisión no Entroido dos Xenerais, e súmase a outras propostas didácticas xa en marcha arredor desta festividade.
