Dous traballos audiovisuais recuperan cadanseu Entroido tradicional

Danza de Entroido do Ulla e O Moredo. A resistencia do Entroido Ribeirao son dous lanzamentos audiovisuais recentes que apostan pola sétima arte para documentar e explicar cadansúa festa tradicional. José María Cebeiro e Xosé Francisco Noia asinan o primeiro destes traballos, un libro-DVD que recupera unha danza desaparecida desde hai preto de noventa anos e posiblemente anterior aos Xenerais típicos da festa nesta zona. Os dous autores recolleron e recrearon as formas desta danza e documentáronos coa intención de facilitar a súa recuperación e reprodución en toda a comarca.

Tráiler "O Moredo" A resistencia do Entroido Ribeirao from pinancho audiovisuais on Vimeo.

Pola súa banda, David Vázquez dirixiu O Moredo. A resistencia do Entroido Ribeirao, un traballo que recolle testemuños dos propios veciños que mantiveron esta tradición. Os problemas coa autoridade durante o Franquismo, os personaxes e as escenas da celebración atópanse nesta obra que se está a presentar en diferentes festivais.