O Concello de Ferrol, berce do autor homenaxeado no vindeiro Día das Letras anunciou esta semana o comezo das actividades para lembrar a Ricardo Carballo Calero. Como primeira proposta, este 24 de xaneiro abrirá no centro cultural Torrente Ballester a exposición Imaxe de cen anos. Trinta primeiras edicións, obxectos da súa vida persoal e académica como reloxos, o seu bastón, medallas ou placas de recoñecemento fan parte deste proxecto que contou coa colaboración da familia. A exposición estará aberta ata o vindeiro 31 de maio. De cara a completar as homenaxes, o concello anunciou a súa intención de convocar unha mesa de entidades interesadas en coordinar o seu traballo a prol do autor.
Tamén desde Ferrol, a cooperativa Rexenerando anunciou o desenvolvemento dun roteiro específico que percorre oitenta anos de historia da cidade coa figura de Carballo Calero como eixe. Ademais, a entidade porá en marcha varios obradoiros sobre o autor para centros de ensino primario e secundario.
