Dorothée Munyaneza.
A nova edición do festival "Escenas do cambio" iniciarase na Cidade da Cultura o vindeiro 31 de xaneiro. Serán dez espectáculos que se sucederán ata o 8 de febreiro e nos que se combinan compañías e profesionais do país con membros da escena internacional. "A idea de camiño, peregrinación e percorrido está presente nas tres pezas galegas", explica Pablo Fidalgo, director artístico do Festival, "e todos os artistas internacionais que presentamos teñen presente a idea de movemento e transformación". Para demostralo, pola banda galega, Los Bravú presentarán Caderno de vacacións, Pálido Domingo fará o mesmo con Pentecostés e Quico Cadaval, 'Guti' e Celso Fernández Sanmartín a contada Tres vellas (polo menos). Da banda internacional participarán artistas como Dorothée Munyaneza, con Samedi Détente ou Ula Sickle, que presentará Relay, un espectáculo de catro horas de duración.
