Carballo Calero na RAG
O web da Real Academia Galega abriu o seu espazo dedicado a Ricardo Carballo Calero, homenaxeado no Día das Letras Galegas deste 2020. Henrique Monteagudo asina un texto biográfico no que pon de relevo a importancia do autor como investigador da literatura galega contemporánea e fai un repaso da súa vida e obra. Tamén o presidente da RAG, Víctor Freixanes, publicou no web da institución un artigo sobre o homenaxeado, no que apunta que para alén do seus méritos como filólogo, "a súa obra literaria merece atención como novelista, como poeta, como ensaísta e dramaturgo, e a súa vocación docente deixou pegada en varias xeracións: nas aulas do Colexio Fingoi en Lugo e nas aulas universitarias despois".
En paralelo, a entidade adiantou a celebración do seu plenario do 17 de maio en Ferrol, así como o vindeiro lanzamento do web divulgativo Primavera das letras e o xa habitual simposio sobre a figura homenaxeada no vindeiro outono.
