Un total de 3.877 estudantes de dez centros de ensino, con idades entre os 12 e os 18 anos, iniciaron este 13 de xaneiro a segunda edición do reto 21 días co galego e+. A proposta que coordina a Secretaría Xeral de Política Lingüística conta este ano con seis centros máis que na primeira xeira e anima ás persoas participantes a facer a proba de falar exclusivamente na nosa lingua durante tres semanas. O reto inclúe unha serie de actividades didácticas nas que cada participante debe desenvolver diferentes presentacións e contidos ademais de reflexionar sobre a súa propia experiencia. A iniciativa pode seguirse a través das redes e está en marcha ata o vindeiro 2 de febreiro.
