A Mesa presenta o seu catálogo de agasallos en galego para o Nadal

Achega máis dun cento de propostas para realizar un consumo responsable a nivel de lingua

Máis dun cento de propostas de compras e agasallos en galego fan parte do novo Catálogo de Nadal que lanza un ano máis A Mesa pola Normalización. O proxecto, como é habitual, recolle propostas en ámbitos como libros, xogos, roupa, experiencias e mesmo alimentación ou instrumentos musicais, en todos os casos realizados ou etiquetados na nosa lingua. A campaña Abertos ao Galego da que fai parte esta iniciativa pretende apoiar as empresas e comercios que apostan por esta lingua na súa actividade e convida a realizar un consumo consciente tamén neste campo.