'O que arde' mellor longametraxe internacional no festival de Mar de Plata

A "quinta provincia" galega tamén ven de sumarse aos recoñecementos ao filme máis premiado da cinematografía galega actual. O Festival Internacional de Cine del Mar de Plata, que pecha hoxe día 18 a súa 34ª edición en Buenos Aires, deulle a O que arde, de Oliver Laxe, o seu Astor de Oro á Mellor Longametraxe da competición internacional. Ademais a película engade ao seu palmarés que Laxe e Santiago Fillol tamén foron merecedores, segundo o xurado, do Astor de Plata polo mellor guión desa competición. Cabe destacar tamén a Mención Especial na sección Estados Alterados do festival obtida por Longa Noite (Eloy Enciso), outro filme galego que está a destacar en todos os festivais e pendente de estrea en salas. Segundo os datos máis recentes do Ministerio de Cultura e Deporte, a exhibición en cines españois de O que arde leva recadados 319.270 € en taquillas, con 58.791 espectadores.