Imaxe da serie Reducción de Romero Beltrán
O xurado do VII Premio Galicia de Fotografía Contemporánea acordaba na noite deste 14 de novembro outorgarlle este galardón á serie Reducción do colombiano Felipe Romero Beltrán. Segundo explica Víctor Nieves, membro do xurado e coordinador do certame, este traballo "posúe unha calidade excelente, tanto técnica como artística, e ademais encaixa perfectamente co obxectivo do premio de concibir a arte como algo social". Nieves destaca que Reducción "fala de inmigración e do acoso policial que sofre este colectivo, extrapolable a outros. Pensamos que cadra moi ben co que está a vivir o Estado Español. Emprega a canle da arte para levar certas ideas cunha estética sublime". A organización dará a coñecer en vindeiras datas a exposición e o libro que conforman o premio deste traballo.
Ao seu ver "este ano foi moi interesante a reunión do xurado porque se presentaron moitísimos proxectos", ata o punto de triplicar o ano de maior participación no certame, cun importante grado de internacionalización. O xurado, composto por el mesmo, Marisa Marimón, Antonio Pedrosa, Carlos Fontes, Encarna Lago Gonzalez e Xosé Lois Vázquez, actuando como secretaria Ofelia Cardo, seleccinou tamén como finalistas do certame obras de Alessia Rollo, Anna Cherednikova, Gabriela Rivera, Javier Arcenillas e Joan Alvado.
