A cidade de Santos, en São Paulo, acollerá desde mañán a exposición "Galicia imaxinada", que amosa a influencia da emigración na creación da imaxe de Galicia no século XIX, a través das publicacións promovidas pola colectividade galega en América. A exposición, que se poderá ver na sala de mostras do Shopping Boqueirao, será inaugurada pola presidenta do CCG, Rosario Álvarez, e o presidente do Centro Español de Santos, Eduardo Alves. A inauguración é parte da viaxe institucional que realiza o CCG para "reforzar as relacións institucionais e os lazos coa colectividade galega no Brasil". Xunto coa xuntanza coa colectividade de Salvador, Rosario Álvarez reunirá en Santos ás institucións representativas dos emigrantes para abordar a "importancia da conservación, organización e tratamento dos seus documentos históricos".
