O Observatorio da Mariña pola Igualdade leva o Premio Begoña Caamaño

O Premio Begoña Caamaño de Proxectos Culturais pola Igualdade da Deputación da Coruña foi para o Observatorio da Mariña pola Igualdade na súa terceira edición. O xurado apuntou como méritos desta iniciativa "un traballo continuado pola igualdade, con impacto directo en diversos ámbitos da sociedade e multitude de iniciativas e proxectos feministas nun territorio que se sitúa á marxe dos centros de decisión" para lle outorgar este galardón dotado con 6.500 euros.

No fallo, ademais, arguméntase a "longa traxectoria do Observatorio da Mariña pola Igualdade, a súa interseccionalidade, a pluralidade e o impacto directo e amplo do seu labor en todos os ámbitos da sociedade", así como o "traballo que desenvolven en rede con outros colectivos que responde ao seu propio nacemento, pola unión de asociacións de mulleres de distintas disciplinas e idades, conseguindo un colectivo con voces moi plurais e un traballo moi amplo".

O xurado estivo composto pola actriz e fundadora da compañía de teatro A Panadaría, Ailen Kendelman, pola escritora e actriz María Lado, pola profesora e activista do feminismo, Sabela Mouriz ademais de polas representantes dos colectivos gañadores da anterior edición Irimia Muelas de Implicadas no Desenvolvemento e Clara Rodríguez por "Elas tamén pintan" de 7H Cooperativa Cultural e presidido polo deputado da área de Cultura, Xurxo Couto, coa xefa de servizo de Cultura, Mercedes Fernández Albalat como secretaria.

O Observatorio Mariña pola Igualdade comezou a súa actividade en 2008 e desde entón traballa a prol da promoción da igualdade de xénero tamén desde o ámbito cultural. As súas actividades articúlanse en torno a diferentes vertentes, con especial énfase no labor informativo e de sensibilización social e a reivindicativa e a activa, un intenso programa de actividades.