A Panadaría gaña o premio Begoña Caamaño de cultura pola igualdade

A IV edición do premio Begoña Caamaño de cultura pola igualdade vai para A Panadaría Teatro. O xurado do galardón que convoca anualmente a Deputación da Coruña acordou na mañá deste 16 de outubro outorgalle este recoñecemento á compañía que levou a escena, entre outros proxectos, a historia do matrimonio de Elisa e Marcela. O premio, dotado con 6.500 euros en metálico, recoñece o "carácter intrinsecamente feminista desde a súa configuración empresarial até as súas prácticas laborais e estéticas, pasando polo seu traballo de creación de redes con diversos colectivos, nun contexto de estruturas fondamente patriarcais".

Do mesmo xeito, o fallo salienta a "proposta arriscada e innovadora que explora o efecto multiplicador do teatro e a capacidade que este ten para a transformación social", e apunta que "A Panadaría leva a súa creación por diferentes espazos, non sempre amábeis, e amosa unha estética fondamente feminista de traballo corporal comprometida coa diversidade sexual e cun aproveitamento extremo de escasos recursos". Areta Bolado, Ailén Kendelman e Noelia Castro conforman esta compañía fundada en 2013 e que obtivo xa múltiplos recoñecementos polo seu traballo.

O comité de selección do premio estivo composto por Lucía Canoura, do Observatorio Mariña Pola Igualdade, gañador da pasada edición do premio, a profesora especialista en Igualdade de Xénero, Carme Moure, a actriz e escritora Iria Piñeiro, a escritora e experta en xénero e desenvolvemento, María Reimóndez e a xestora cultural feminista, Clara R. Cordeiro, co deputado de Cultura, Xurxo Couto como presidente e a xefa de Servizo de Cultura, Mercedes Fernández Albalat como secretaria,