O xurado, presidido pola deputada de Igualdade Sol Agra, estivo formado por Adrián Manuel Gonçalves Barbosa, María Victoria Rivadulla Conde e Daniela Ferrández Pérez, actuando como secretaria Manuela Muñiz Souto, xefa do Servizo de Acción Social, Cultural e Deportes da Deputación. Para emitir o seu fallo, "valoraron especialmente a coherencia metodolóxica, a calidade artística e o forte impacto social das propostas premiadas", segundo indica a entidade provincial.
Agra salientaba na presentación do fallo que moitas das propostas gañadoras "están pensadas para chegar a centros educativos, colectivos feministas, espazos culturais ou comunidades locais, multiplicando así o seu efecto". Deste xeito, "boa parte das propostas recuperan historias de mulleres que quedaron fóra dos relatos oficiais. Recuperar esas voces é un acto de xustiza e tamén unha forma de educar as xeracións máis novas na memoria democrática e na igualdade".
Na listaxe de galardóns, recibirán 12.500 euros a proposta audiovisual de memoria histórica feminista Espontaneadas, de Martela Films; Virando o rosa, de Diana Fajardo Rama, centrada en dar voz a pacientes de cancro de mama; a proposta escénica Non precisamos perdoar de Eugenia Manuela Sanmartín Alonso sobre a violencia institucional sobre as mulleres e Non damos puntada sen fío, de Chiripa Producións, que reivindica o traballo das mulleres en diferentes ámbitos e a súa conexión "co tecido teatral galego, coa autoría feminina e coa tradición das modistas".
Canda a elas, obtiveron a mesma contía as propostas En loita. A voz das mulleres na oposición antifranquista, da Cooperativa Mazarelos que "aposta pola memoria oral, pola produción audiovisual en galego e pola creación de recursos para públicos diversos", e mais Saúde, pracer, república e terra en malva, co que Feitoría Verde quere recuperar e divulgar a figura de Lola Ferreiro como referente feminista.
Completan a listaxe de galardoadas A ditadura é un señor con bigote, de María Montserrat Fajardo Pérez, que obtén 12.467 pola súa investigación das causas xudiciais contra mulleres e o estudo da misoxinia estrutural do franquismo. Tecelás da terra. Sementes con memoria e futuro, de Tania Merelas Iglesias, obtén 12.281,50 euros para unha proposta de enfoque ecofeminista na que se atopan "saberes tradicionais, participación cidadá, cultura e coidados nunha proposta sólida que empodera ás mulleres, fortalece redes comunitarias e introduce novas prácticas educativas e culturais nas bibliotecas públicas".
