Como cada ano, a celebración paralela de Viñetas desde o Atlántico e mais do encontro de autoedición Autobán concentran a presentación de novidades da banda deseñada galega. No campo editorial, acaba de se dar a coñecer a edición en galego de Microalgas, publicación didáctica da Universidade da Coruña realizada por Xulia Pisón e que xa vira a luz como autoedición en castelán. Canda a isto, Demo Editorial presenta Tanta paz leves, segunda obra de Tomás Guerrero na que o autor muda de estilo gráfico para abordar a complexidade sociopolítica de Europa durante a última posguerra.
No campo da autoedición, o Autobán acolle unha ampla listaxe de presentacións, con proxectos como Verano infinito, compilación de tres historias a cor de Diego Blanco nas que o autor aposta polas posibilidades narrativas do debuxo cun uso limitado das palabras. Tamén ve a luz nesta cita Mus´ Stories, unha obra de humor protagonizada por un ourizo e unha rata ou o novo traballo de Pepe Mansilla, 25 motivos para ser do Dépor.
A coincidir con estas presentacións, anúnciase en Estados Unidos o terceiro número da edición americana de O último día, guionizada polo vigués Fernando Llor e con debuxo de Ángel Bernuy. A editorial Tidalwave Productions é a responsable deste lanzamento.
