Da man de Daniel Amós Rodríguez está xa dispoñible na rede Mundo Escénico, unha nova plataforma virtual que quere servir de punto de encontro para o sector galego das artes escénicas. O proxecto conxuga a estrutura dunha rede social, na que os diferentes usuarios contan con perfís propios, cunha axenda, información de actividades e recompilación de propostas formativas entre outros contidos. Nado ao abeiro do programa Go2Work, da Deputación de Pontevedra e da Escola de Organización Industrial, o espazo sinala que dispón dun directorio de 2.000 grupos, compañías e bandas dos ámbitos do teatro, a danza, a música e o folclore.
