O circuíto +Escénicas ofrecerá 105 actuacións de teatro ou danza na provincia de Pontevedra

Ata 105 actuacións en 51 concellos de menos de 20.000 habitantes ofrecerá o novo circuíto de teatro e danza '+Escénicas' da Deputación Provincial de Pontevedra ata o mes de marzo de 2025. As cifras desta oferta melloran moito o programa do ciclo de teatro 'Tornar as táboas' que ven substituír, por riba do dobre de actuacións do anterior (49) e, neste caso, cun catálogo de compañías que multiplica por nove o anterior, chegando a incluír espectáculos de 286 compañías de teatro e danza de toda Galicia. Xustamente a elaboración deste catálogo é un dos puntos novidosos e máis destacados de +Escénicas, unha iniciativa que atende unha demanda histórica do sector. As datas da programación daranse a coñecer nos vindeiros días.

Trátase do primeiro circuíto que integra teatro e danza posto en marcha pola Deputación e está dotado cun orzamento de 175.000 euros, dos que lle corresponde a cada concello un máximo de 3.400 euros para programar ata tres actuacións. A Deputación financiará o 90 % do custo naqueles concellos de menos de 5.000 habitantes, o 80 %, nos de están entre 5.000 e 10.000; e o 70 %, nos que teñen entre 10.000 e 20.000. Son os gobernos locais os que escollen do catálogo elaborado polo organismo provincial, que conta con 258 compañías de todas as disciplinas relacionadas co teatro e 28 de danza, as actuacións a programar nos seus auditorios ou centros culturais.