Para as 19:30 horas deste 19 de xuño está prevista a inauguración dun dos proxectos culturais mais longamente agardados do noso país. O Museo Galego do Viño será unha realidade na Reitoral de Santo Andrés de Camporredondo, Ribadavia, case quince anos depois da data de apertura prevista inicialmente. O Diario Oficial de Galicia publicaba onte o decreto polo se crea esta entidade, dedicada "recuperar, documentar, conservar e difundir o patrimonio cultural, material e inmaterial, de interese etnolóxico e vitivinícola de Galicia para o coñecemento, aprendizaxe e desfrute da cidadanía en xeral e o aproveitamento e consulta das persoas dedicadas á investigación e ao estudo do universo vitivinícola, en particular".
O novo centro artéllase en oito salas, que recollen pezas relacionadas co cultivo das cepas, tanto dende o punto de vista histórico como dende os ciclos tradicionais de colleita, así como pezas significativas relacionadas con cada denominación de orixe do viño en Galicia. Unha sala dedicada en particular á comarca do Ribeiro elementos que amosan o proceso de elaboración desta bebida, "desde que chega a uva á adega ata a súa conversión en viño".
