Será, co de Campolameiro, o primeiro centro da Rede de Patrimonio Arqueolóxico. San Cibrán de Las, o maior castro de Galicia, terá rematado en maio o seu Centro Arqueolóxico. Así o anunciou hoxe a conselleira de Cultura, Ánxela Bugallo, logo dunha visita ás obras do mesmo, que cubren unha superficie de 3.000 metros cadrados. Queda agora licitar o vindeiro mes o concurso para o proxecto museográfico do centro, que conta cun orzamento de 1,8 millóns de euros e que abrangue o deseño, subministro e instalación de equipamentos culturais para o parque. Segundo adiantou Bugallo, está prevista que a apertura do parque, que ten en total 25 hectáreas, sexa en decembro.
