A Xunta aproba participar no proceso civil de recuperación de Meirás

O Consello da Xunta aprobou onte dar autorización aos servizos xurídicos do Goberno galego a comparecer como parte do proceso civil iniciado pola Administración xeral do Estado no Xulgado de Primeira Instancia número 1 da Coruña conducente á recuperación para o patrimonio público do Pazo de Meirás e en contra da propiedade da familia do dictador Francisco Franco. O goberno galego sempre declarou esta intención en consonancia coa declaración parlamentaria unánime da cámara de representantes da Comunidade. O Pazo de Meirás foi declarado ben de interese cultural, coa categoría de sitio histórico, polo Decreto 299/2008, do 30 de novembro. A Lei de patrimonio cultural sinala que o Goberno galego poderá acordar medidas de colaboración coa Administración xeral do Estado que fortalezan ou melloren a vixilancia e seguridade dos bens que integran o patrimonio cultural de Galicia, especialmente cando se vexan ameazados por actos de espolio ou destrución e con esta participación no proceso a Xunta asume a súa obriga de salvagarda do patrimonio cultural galego.