Os xulgados da Coruña recibían este mércores unha demanda de cen folios por parte da Avogacía do Estado reclamando a devolución do Pazo de Meirás ao patrimonio público por parte da familia do ditador Francisco Franco. Así o informaba hoxe o xornal El País para despois facerse eco o resto dos medios. A demanda por parte do Goberno do Estado fóra amplamente reclamada desde institucións galegas como a Xunta de Galicia, o Parlamento e a Deputación Provincial da Coruña, entidade esta última que impulsou a creación da Xunta pro Devolución do Pazo de Meirás integrada por varios concellos como Sada e A Coruña, A Real Academia Galega, Universidades galegas e entidades da Moría Histórica. Xustamente foron os informes xurídicos feitos a iniciativa das institucións galegas os que resultaron fundamentais para a demanda agora presentada desde a Avogacía do Estado que viu neles a base para considerar "fraudulenta" a adquisición da propiedade polo ditador e a súa familia, que ademáis foi obxecto de dúas adquisicións segundo detallan os informes. A demanda está presentada ante o Xulgado de primeira instancia Nº1 da Coruña contra os netos de Franco, Carmen, Jaime, Aránzazu, Cristóbal, María del Mar e María de la O Martínez-Bordiú, xunto coa mercantil Prístina, SL, vinculada á familia. A finalidade da demanda é a recuperación como Patrimonio do estado do ben inmoble.
