A Asociación Buril dá por finalizados 36 anos de activismo cultural

Logo de non conseguir relevo para a súa directiva, a Asociación Buril, histórica entidade da cultura de base burelá, anunciaba a pasada semana a súa disolución. O Concello acordou facerse cargo dos fondos documentais da asociación, nada hai 36 anos, e xestionalos desde a biblioteca e o arquivo municipais. Os fondos económicos da entidade, pola súa banda, distribuiranse entre entidades de carácter social como a Asociación Camiña ou a Asociación de Axuda ao Enfermo Mental.

Segundo repasa a entidade no seu blog, Buril mantivo "unha programación continuada entre os anos 1984 e 2016, con momentos de maior actividade e con algunha pausa puntual froito do relevo na súa xestión". Entre os fito da súa historia, destacan a publicación da revista O Trasno (1985 - 1990), as Xornadas de Teatro (1987 a 1998), o proxecto Burela na memoria, o festival Pataca ou as Xornadas de Historia Local entre outras.