A Xunta concede as axudas á animación á lectura do programa Ler conta moito

O Diario Oficial de Galicia recollía onte a orde de concesión das axudas a entidades locais de Galicia para a programación de actividades de dinamización da lectura nas bibliotecas e/ou axencias de lectura públicas de titularidade municipal no marco do programa Ler conta moito. En total, distribúense 195.000 euros entre 154 concellos, cada un dos cales recibirá 1.026,31 euros no marco desta iniciativa. Con estes fondos, os concellos poderán cubrir o 75% do custo das actividades que poden seleccionar no catálogo deste programa, e deberán facerse cargo do 25% restante.

O atraso na contratación deste programa provocara protestas do Colectivo de Narradoras Orais de Galiza que apuntaban que no pasado ano xa perderan un 22% de facturación por este motivo e sinalaban que en 2019 a situación estaba a se repetir. En febreiro, a dirección xeral de políticas culturais anunciara un incremento de 150.000 euros, ata os 345.000, nunha liña específica de subvencións destinada a actividades orientadas á prevención e sensibilización contra a violencia de xénero.