Logo de recibir máis de 600 proxectos na convocatoria aberta O teu Xacobeo, a Xunta de Galicia decidiu ampliar en 2,7 millóns de euros os fondos destinados a este programa. Deste xeito, serán un total de 4,7 millóns os destinados a apoiar proxectos de dinamización de cara ao 2021 propostos por concellos, entidades privadas con ou sen ánimo de lucro ou administracións. O proxecto cofinancia iniciativas de ámbito artístico, patrimonio-historia-pensamento-espiritualidade, gastronomía, ámbito deportivo e ámbito social e pretende "implicar e fomentar a participación de todos os axentes da sociedade para deseñar xuntos unha programación sociocultural que anticipe a celebración do Xacobeo 21 e a súa repercusión". Segundo adianta a Consellaría de Cultura, a resolución da convocatoria realizarase "en próximas datas".
