Un mapa presenta os recursos sobre o portugués en Galicia

Acaba de saír á luz Bússola Literária un mapa que localiza "os espaços relacionados com as literaturas de língua portuguesa que existem no território galego". O proxecto, que xurdiu como un traballo de clase da materia Sociologia das Literaturas de Língua Portuguesa da Facultade de Filoloxía da Universidade de Santiago recolle desde espazos onde se pode estudar portugués ata lugares onde se poden adquirir ou acceder a libros e outro material na lingua de Camões. O proxecto mesmo atende a editoras que publican en portugués no noso país e a eventos culturais vencellados á lusofonía.



Segundo os datos recollidos no proxecto, os principais espazos para a difusión da literatura portuguesa no noso país son os institutos, seguidos por bibliotecas e librarías. Deste xeito, a Xunta de Galicia, titular dos centros de ensino, aparece como principal institución de difusión da lingua e literatura do país veciño. Eventos, premios literarios e editoras aparecen como os seguintes axentes implicados neste campo.