Catro museos incorpóranse á rede de Espazos Museísticos Atlánticos

A Fábrica de Sel, en Muros, acolleu o pasado xoves a xuntanza do consello da Rede de Espazos Museísticos Atlánticos, unha entidade que reúne a espazos "cun interese común por preservar a cultura mariñeira e a historia". Nesta reunión, a rede decidiu integrar tamén o Museo ANFACO da Industria Conserveira, o Museo de Historia Natural de Ferrol, o Museo Mares de Cedeira e a Torre de Hércules. Aínda que a rede ten vocación de integrar diferentes centros da fachada atlántica europea, ata agora a maior parte deles son de Galicia, máis o Museo Marítimo de Ílhavo, en Portugal, ata un total de quince entidades. O obxectivo da rede REMA é obter unha imaxe conxunta, promoción dos espazos "a nivel internacional" e "ampliar a rede de contactos e a cooperación en proxectos".