As axudas á creación escénica da Agadic mantéñense en 650.000 euros

O Diario Oficial de Galicia recolle hoxe a convocatoria das subvencións á creación escénica, novo nome das que ata o de agora eran axudas á produción. Malia a esta mudanza, a contía desta liña de apoio mantense en 650.000 euros, e a principal modificación na mesma dáse nas modalidades de subvención.

Deste xeito, se ata este ano había catro modalidades destinadas respectivamente a empresas de nova creación e espectáculos de pequeno, mediano e gran formato, desta volta as axudas atenden a diferentes artes escénicas. Así, mantéñense as axudas á creación de espectáculos por parte de empresas de nova creación, que distribuirán 70.000 euros. A maior parte das axudas, 470.000 euros, destínanse a "subvencións á creación escénica no ámbito do teatro, novo circo e maxia", mentres outros 110.000 cubrirán o ámbito da danza e das artes do movemento.

No caso da primeira modalidade, apoiaranse proxectos que non superen os 20.000 euros de orzamento, cun apoio máximo de 18.000, mentres á segunda poderán concorrer obras cun custo de ata 80.000 euros que poderán recibir ata 60.000. Finalmente, na categoría de danza e artes de movemento apoiaranse espectáculos con orzamentos máximos de 50.000 euros, que poderán levar ata 37.500 euros. As compañías interesadas contan cun mes de prazo para presentar as súas solicitudes.