A Coordinadora de Traballadores/as de Normalización da Lingua (CTNL) acaba de presentar a primeira edición dos Premios Mil Primaveras. Estes novos galardóns queren recoñecer o traballo de servizos de normalización lingüística (SNL), equipos de normalización e dinamización lingüística (ENDL), asociacións e outras entidades públicas ou privadas, "que teñan como obxectivo a promoción do uso e do prestixio da lingua galega".
Segundo explica a organización, estes galardóns, sen dotación económica, contan coas categorías de premio ao mellor proxecto estabilizado, para aqueles que levan en marcha cinco ou máis anos, ao mellor proxecto novo, nado a partir de 2017, á mellor comunicación e impacto, ao proxecto máis innovador, ao mellor proxecto de fomento do galego na infancia e/ou mocidade e mais ao proxecto de fomento e ámbito sectorial.
As candidaturas a estes galardóns pódense presentar mediante un formulario no web Milprimaveras.gal ata o vindeiro 17 de maios.
