Os Premios Mil Primaveras recoñecen seis proxectos a prol da linga

A terceira edición dos Premios Mil Primaveras a proxectos de posta en valor e fomento do galego, organizados desde a Coordinadora de Traballadores/as de Normalización da Lingua (CTNL) ven de facer públicos os fallos do seu xurado nas seis categorías que abranguen. Os Premios Mil Primaveras non teñen dotación económica, creáronse coa finalidade de valorar, recoñecer e difundir accións, campañas, programas e proxectos que teñen como obxectivo principal a posta en valor e o fomento da lingua e a procura do incremento do seu uso e/ou prestixio. O xurado da terceira edición dos galardóns estivo formado por Soco García Conde, técnica de normalización lingüística do Concello de Santiago de Compostela; Nel Vidal Barral, docente no IES Rego da Trabe, de Culleredo; Inmaculada Seage Freire, técnica de normalización lingüística dos concellos de Rois e Dodro; Fátima Rodríguez Ruibal, docente no IES Antón Alonso Ríos, de Tomiño; e Iolanda Fernández Casal, xornalista e responsable de comunicación da Real Academia Galega.

Os proxectos e programas presentados son, en case todos os casos, iniciativas destinadas ao fomento do galego desde a infancia e na mocidades. Así, o Premio ao mellor proxecto estabilizado, escollido entre aqueles que se leven desenvolvendo durante cinco anos ou máis, foi para Do berce á rúa, a actividade que desenvolve desde 2010 o Servizo de Normalización Lingüística do Concello de Narón. O xurado salientou que foi un dos primeiros espazos que se creou con recursos para a crianza en galego e serviu de modelo para un programa referente coma o Apego, co cal convive e coopera. No relativo ás iniciativas máis novas, que iniciasen o seu percorrido despois de 2019, o xurado deu o seo Premio Mil Primaveras a CantáMOLA en galego, proxecto do Servizo de Normalización Lingüística do Concello de Pontevedra, feito por Pepe Cunha e Teresa Cuíña, para dar a coñecer a riqueza e variedade da música en galego, por ser un proxecto que aborda a necesidade de visibilización da música en galego de todos os estilos e por estar especialmente dirixido á mocidade.

O xurado desta terceira edición dos galardóns decidiu que o Premio á mellor comunicación e impacto, escollido por acadar un grande impacto social e por supor un modelo positivo de comunicación se repartise entre dous proxectos relacionados entre eles e con dúas grandes plataformas de rede sociais: Twitter en galego e Instagram en galego. O xurado destacou que son proxectos efectivos, con alta repercusión social e nos cales se traballa de forma horizontal. Tamén valorou o feito de que se superan os 33.000 seguidores en Twitter, e os 32.000 en Instagram, e que son referentes para outras iniciativas. No relativo á capacidade de anovar, o Premio ao proxecto máis innovador, escollido atendendo á innovación da súa maneira de intervir, da súa linguaxe, do seu ámbito de actuación, foi para Somos xogo, un proxecto privado de difusión do patrimonio lúdico e de xogos. Esta iniciativa da empresa Xandobela. Educación e Cultura, mereceu o premio ao destacara para o xurado o seu carácter "aglutinador, transversal, que achega a tradición á actualidade e que asocia a lingua a algo que valoramos positivamente, o xogo". O premio na categoría destinada principalmente á infancia e á mocidade recaeu no proxecto escolar Dicionario galego para boomers, do IES Leiras Pulpeiro de Lugo. O xurado salientou que é un proxecto que dá protagonismo e papel activo á xente nova e vincula o galego non co pasado, senón co novo, o moderno e o máis actual. O xurado tamén destacou a eficiencia comunicativa a través das redes que manexa a mocidade e o coidado deseño. O xurado escolleu como mellor iniciativa sectorial, aquela que persegue un maior uso do idioma nun eido sectorial concreto, o proxecto Media laranxa, dirixido á cociña e a gastronomía, con gran repercusión nas redes sociais, onde busca o diálogo coas persoas usuarias, principalmente a través de xogos. O xurado tamén valorou que consiga a colaboración de empresas e que poña en valor a riqueza dialectal, alén do emprego de soportes actuais, pois ten presenza en TikTok, Instagram e Facebook.