Os XXI Encontros para a Normalización Lingüística detéñense na divulgación da ciencia

A divulgación da ciencia en lingua galega será o tema principal dos XXI Encontros para a Normalización Lingüística que organiza o Centro de documentación Sociolingüística do Consello da Cultura Galega na Cidade da Cultura entre o 4 e o 5 de abril. "Como espertar o interese dos potenciais receptores e trasladar toda esa “efervesciencia” ao fardel cultural do conxunto da poboación? E... ¿en que lingua se está a producir ese despregue de actividade?, ¿ata que punto é este un campo de oportunidade para a lingua galega?", pregúntanse desde a organización. No programa participan investigadores e divulgadores como Marilar Aleixandre, Iolanda Fernández Casal ou Xurxo Mariño.