O Consello da Cultura e a Consellaría colaborarán no campo da normalización

Un audiovisual sobre os 50 anos da declaración do Día das Letras e un libro a cargo de Xosé Neira Vilas sobre a lingua e cultura galegas en Cuba son dúas as accións que desenvolverán o Consello da Cultura Galega e mais a Consellaría de Cultura nos vindeiros meses no campo da normalización lingüística. As dúas entidades asinaban onte un convenio polo que se comprometen a investir un total de 34.500 euros en iniciativas a prol da nosa lingua. Entre as mesmas inclúese a celebración, os vindeiros 18 e 19 de abril, dos XV Encontros para a Normalización Lingüística, as xornadas que organiza anualmente o Centro de Documentación Sociolingüística de Galicia do Consello da Cultura.