Os XI Encontros para a Normalización avaliarán a política lingüística desta lexislatura

Este xoves comezan en Santiago os XI Encontros para a Normalización Lingüística. Uns encontros organizados polo Centro de Documentación Sociolingüística do Consello da Cultura Galega co obxectivo de reflexionar sobre a planificación da lingua no país. Nesta ocasión, o encontro divídese en dúas sesións: na do xoves avaliarase a política lingüística destes últimos catro anos, ademais de propor un debate no que agromarán propostas e suxestións para accións políticas futuras; mentres que a do venres terá un enfoque máis sociolóxico e que permitirá analizar, entre outras temáticas, a integración sociolingüística de emigrantes retornados. Pecha as xornadas unha sesión lúdica que revisa os pasos dados cara a normalización social do galego.