Escena Galega incorpórase a organización de Galicia Escena Pro

O mercado de artes escénicas Galicia Escena Pro abrirá na súa sétima edición unha nova época. A cita, que ata o momento organizaba a Axencia Galega das Industrias Culturais (Agadic) contará a partir de agora coa colaboración da asociación empresarial Escena Galega na xestión do evento. Segundo explica Agadic, con esta incorporación "a Administración autonómica busca estreitar o diálogo co sector e, en consecuencia, reforzar a finalidade coa que Galicia Escena PRO botou a andar en 2013 para servir de estímulo á contratación dos espectáculos producidos na nosa Comunidade".

A vindeira xeira, que xa ten cartel, desenvolverase en Compostela entre os vindeiros 10 e 13 de xuño, co Salón Teatro, o Teatro Principal, o Auditorio Abanca e a local da Fundación SGAE como sedes. As compañías interesadas en participar na mostra teñen ata o vindeiro 27 de marzo para presentar as súas propostas. Posteriormente, unha dirección artística nomeada por Escena Galega seleccionará as producións galegas que se exhibirán completas no programa de espectáculos, así como os proxectos que se presentarán en formato pitching.