O programa de residencias teatrais do concello compostelán acolleu 31 proxectos

O programa de Residencias Teatrais que o Concello de Santiago ofrece na Sala Agustín Magán acolle a produción do vindeiro espectáculo da compañía Voadora, que se estreará en xaneiro e ten como nome provisional Viñemos dalo todo. Así se informou hoxe nunha rolda de prensa por parte da concelleira de Acción Cultural, Branca Novoneyra, que estivo acompañada de Hugo Torreiro en director artístico de Voadora. Novoneyra fixo balance deste programa de residencias, o único no panorama municipal galego, que nos seu dous anos e medio de funcionamento deu soporte a 31 espectáculos de artes escénicas de 24 compañías profesionais nesta sala situada no centro sociocultural de Santa Marta. "As residencias contribúen a mellorar as condicións de traballo das compañías de artes escénicas, que poden utilizar un espazo municipal para probar e axustar os seus procesos de creación", dixo a edil. Pola súa banda Torreiro avanzou que o espectáculo que está a preparar Voadora mantén a liña temática da compañía cunha relevancia no apartado musical das propostas, a tal punto esta obra desenvolverase a partires dun concerto que irá collendo forma teatral. Outra dependencia municipal, o Teatro principal, acollerá a súa estrea.

Está é a terceira convocatoria deste programa do que Novoneyra constata unha gran demanda polo sector e que agarda que poida servir para animar a outros concellos a tomar como referencia para poñer en funcionamento experiencias similares. A primeira convocatoria de residencias artísticas permitiu que un total de oito compañías utilizaran a Sala Agustín Magán entre xaneiro e xuño de 2017. No período de setembro a xullo de 2017 foron trece as compañías seleccionadas, mentres que na última convocatoria (de setembro de 2018 a xullo de 209), serán un total de dez as compañías residentes. A concelleira admite que se trata dun programa que non é sinxelo poñer en marcha e que precise dun desenvolvemento continuado nos anos para poder axustarse ás necesidades reais das compañías, así por exemplo nas anteriores convocatorias foron facéndose algúns cambios como ampliar o tempo outorgado ás compañías no centro. Tamén mencionou as dificultades para poder compatibilizar o uso dunhas instalación inicialmente dedicadas á cultura de proximidade, como as de Santa Marta, cun uso específico orientado a un sector como é o das residencias artísticas. Nese sentido a convocatoria do programa de residencias implica tamén a oferta dalgunha actividade aberta aos veciños que enriqueza o espazo de proximidade. A Sala tamén está incluída na rede Residencias Paraíso, un programa de iniciativa privada do Colectivo RPM para proxectos de danza. Branca Novoneyra adiantou a intención do Concello de afondar con ambición noutros programas de colaboración en rede xa de carácter europeo para a sala Agustín Magán.